過去幾篇嘅退休文全部沿自財政預算案 Lifetime Allowance﹙LTA﹚嘅廢除，本來已經覺得個概念有啲荒謬，點知喺進一步了解稅制嘅過程入面，個複雜程度遠超想像，姑且叫超過 Lifetime Allowance 嘅退休金收入嘅附加稅為長命百稅，因為接近終其一生都可能會受佢影響。
長命百稅簡化情景
先簡單講兩種收稅情況，LTA 長命百稅一係 25%、一係 55%。
Lumpsum
當 LTA 齊頭 £1m，假設你個退休金儲咗整整三球 £3m，而你想一次過洗晒佢，一炮過 Lumpsum﹙UFPLS﹚拎出嚟，咁多咗出嚟嗰 £2m 就會交 55% 嘅 LTA Tax Charge，得返 45% 落袋，但就唔駛再交入息稅。頭嗰 £1m 呢？就同之前提及，25% 免稅，淨低 75% 交入息稅。
唔係好知啲老嘢會唔會記得報稅嗰陣唔好包收咗 LTA Charge 嘅 UFPLS，但係又要加返未過 LTA 嗰部分嘅 UFPLS。
Drawdown
假設唔係 Lumpsum，而係 Crystallised 嘅情況，假設你 Crystallised 咗 £3m，頭 £1m 冇事有幹就咁交入息稅，之後嗰 £2m 先扣 25% 嘅長命百稅，淨低﹙即 £1.5m﹚再加埋其他收入納入息稅﹙總共 £2.5m 加 state pension 加其他任何非退休金收入﹚。
即係話，同一筆錢，如果你係 40% 稅階，咁超過 LTA 嘅 Lumpsum 嘅總稅率會係：
1 - (1 - 25%) × (1 - 40%) = 55%
亦即同等 Lumpsum 長命百稅；但係如果交緊 20%﹙機會較細﹚，crystallised 咗會有著數；反之，超高收入人士，唔 Crystallise 直接 UFPLS 就會抵啲。所以喺退休金 uncrystallise 同真正落袋之間呢個 crystallisation 「結晶」過程，有一個用嚟決定交咩稅嘅作用。
長命百稅同 25% 免稅收入嘅藕斷絲連
由於有額外長命稅，同時四分一免稅，咁唔同嘅先後次序就會產生好唔同嘅稅收，研究咗好耐：
究竟雞先定蛋先？
- UFPLS 成舊錢 25% 免稅﹙例如 £3m 入面嘅 £750k﹚，再減 LTA﹙£1m﹚，先再交 £2.25m 嘅 55% 稅？
- 定成舊錢減 LTA 交長命稅，淨返再成舊嘅 25% 免稅？？定其他組合？
- Crystallise 退休金嘅時候，有 25% 免稅收入 PCLS 即時落袋，但如果我舊錢去到 £40m，免稅收入去到 £10m，過晒 LTA，咁仲係唔係免稅？？唔係嘅話，又點收稅法呢？
25% 免稅收入同 LTA 關係
雖然字面上、或者網上好多資源都只係簡單咁指出 LTA 純粹係退休金拎錢拎到某個位就加稅、25% 免稅收入 Tax Free Cash (TFC) 就係退休金嘅四分之一，但實際上，TFC 同時上限為 LFA 嘅 25%。
因此，基本上可以歸納為：退休金由零到 LTA 就 25% 免稅，之後納入息稅；LTA 之後嘅金額，唔再有 TFC，而且先要畀 LTA 額外稅，再﹙視乎情況﹚納入息稅。所以，以上嗰三種情況係唔會出現。
UFPLS 相對簡單，過咗 LTA 嘅部分，冇咗 TFC，而且全部交 55% 稅但就唔駛交入息稅，45% 完全袋落袋。
Crystallise 嘅話，過咗 LTA 嘅部分分開處理，呢部分唔會有 PCLS，而且會即時扣起 25% 直送 HMRC，淨返先留喺你嘅 Crystallise Pension，畀你 Drawdown 或者買年金，到時就收你入息稅。
長命百稅嘅移動龍門
最初嗰篇文都列出咗歷年 LTA 嘅變化，可加可減，不斷搬龍門，大部分人都唔係同一年就拎晒啲錢出嚟，咁計邊一年嘅 LTA 呢？最理想梗係計最高嗰年啦，不過佢又點會咁著數呢？所以佢引入咗 LTA 「使用量」呢個概念，同一個財政年度 LTA 不變，所以就睇每一年你拎咗幾多錢出嚟，用百分比表示，你個 LTA 用咗幾多，而百分比係準確至小數後兩個位、仲好寬宏大量咁唔進位﹙round down﹚。
LTA 餘額計法嘅例子
第一年
假設一開始退休嗰年 LTA £1.1m，你 Crystallise £360k，由於未用過 LTA，所以當中四分之一嘅 £90k 就免稅 PCLS，淨返 £270k 喺個 Crystallised Pension 入面，一 Drawdown 或者有年金收入先開始納入息稅，而呢一年你用咗 32.72% 嘅 LTA，淨返 67.28%
第二年
假設 LTA 加到去 £1.2m，你 Lumpsum (UFPLS) 拎 £400k，咁都係未過 LTA，所以 £100k 免稅，其餘納入息稅，呢一年你再用咗 33.33% 嘅 LTA，淨返 33.95% LTA。
第三年
假設 LTA 再加到去 £1.3m，即係你有 33.95% 即係 £441,350 嘅 LTA 仲可以用，如果呢一年你想拎 £500k 出嚟，就會有 £58,650 要交長命百稅。如果呢筆錢係 Crystallise，咁就有 £441,350 入面嘅 25% 係 PCLS 免稅收入，淨返嘅 75% 入 crystallised fund；同時，嗰 £58,650 要交 25% 嘅額外稅，淨返都係 75% 入 crystallised fund，加埋應該啱啱好係 £500k 嘅 75%：
- PCLS = £110,337.5
- Crystallised Pension = £375,000 ﹙之後拎出嚟就收入息稅﹚
- LTA 附加稅 = £14,662.5﹙即刻磅唔好兩頭望﹚
如果 £500k 係 Lumpsum，咁當中就有 £110,337.5 係免稅，£331,012.5 收入息稅，£58,650 要交 55% 附加稅。
LTA 嘅七十五歲大限
目前為止，成個稅制最令我感到痴撚線嘅就係所謂 Lifetime Allowance 附加稅只係收到 75 歲就會收皮，令人困惑，點解改個咁嘅名，始終多數老坑退休之後都會長命過 75 歲，何 Lifetime 之有？可能係以前嘅稅制流傳落嚟冇得簡化啩。
Benefit Crystallisation Event (BCE)
不幸地，喺度要再引進多一個術語 BCE，因為之後要用到呢啲簡稱幫助說明。BCE 基本上係一系列會撻著 LTA 嘅條件，一撻著就會有所謂 BCE Test 去判斷一個老坑駛唔駛交附加稅。總共一至九項 BCE，當中第五項再細分為 BCE 5、BCE 5A、5B、5C 同 5D，不過以下淨係抽出同 DC Plan 有關，而且唔理瓜老襯同退休金移民嘅 BCE。而所有 BCE 都發生喺 75 歲或之前，所以 75 歲之後係唔會有 LTA 附加稅。
BCE 1
75 歲前將舊錢 Crystallise 嗰吓就會發動 BCE 1，譬如 Crystallise £100k，BCE 1 就會即刻計你 £100k 會用咗幾多 LTA%，未用晒就會有 £25k 做 PCLS。
BCE 4
75 歲前買年金嗰吓會發動 BCE 4，如果係 Uncrystallised Pension 入面買，我諗你可以選擇拎 25% PCLS 現金，淨返買年金而呢個收入要全數納入息稅；或者應該可以將嗰 25% PCLS 即時買年金﹙免咗稅﹚，變相係全額買年金但係只有 75% 要交入息稅。
不過，喺 Crystallised Pension 入面買年金嗰一刻，都會發動一次 BCE 4，成件事好撚搵笨，因為 Crystallise 嗰吓已經發動咗 BCE 1，食咗你嘅 LTA，如果筆錢擺喺度唔拎住，繼續投資有回報，到你想買年金嗰吓，佢發動 BCE 4 會睇吓你呢一刻個 crystallised pension 減去 BCE 1 嗰時個數，多咗係會扣 LTA，但係你又唔會多咗 25% 免稅收入落袋喎！
例如，BCE 1 嗰刻 Crystallise £100k，£25k PCLS，£75k Crystallised，唔攞錢住，幾年後 £75k 滾到 £80k，手痕買年金，呢個時候你就冇咗 £5k 嘅 LTA，而當初嘅 £25k PCLS 都係得 £25k。
相反，如果唔係買年金，自行露活咁 drawdown，係唔會發動任何 BCE，對 LTA 唔會有任何影響。
BCE 6
先跳過 BCE 5 系列講 BCE 6：75歲之前 PCLS 同 UFPLS 都會發動 PCE 6，但係由於 PCLS 應該必然發動 BCE 1，所以我都唔知點解 BCE 6 要額外再包埋 PCLS。
BCE 5、5C、5D
BCE 5 只係關 DB Plan 事﹙到 75 歲會觸發﹚，5C 同 5D 就關個人死咗但係退休金撥畀受益人事，所以呢度唔詳盡。
BCE 5A
BCE 4 係當你 75 歲之前喺 crystallised fund 入面買年金要發動 BCE，有機會因為 crystallise 之後有投資回報而扣 LTA。但當你一到 75 歲，BCE 5A 就會幫你睇多一次成個 crystallised fund 有冇賺到錢，有就即時扣 LTA，多過 LTA 就喺舊退休金入面即時收 25% 附加稅。
所以喺 crystallised pension 入面，想買年金就儘早買，筆錢投資賺咗要同政府分，想 drawdown 都要趁早喺 75 歲之前拎晒佢，除非你成世人筆退休金都同 LTA 有一距離咁就冇分別。
﹙成世人？乜唔係去到 75 歲咩？下面再講﹚
BCE 5B
同一時間，當你一到 75 歲，如果仲有 uncrystallised fund、或者佢稱之為 unused fund，就會觸發 BCE 5B 扣 LTA，如果超過淨返嘅 LTA，咁就喺戶口入面即時扣起 25% 直送 HMRC。
七十五歲之後死而不僵嘅 LTA
雖然 75 歲之後唔會再收 LTA 額外長命稅，但係由於同 25% 免稅收入嘅藕斷絲連，導致 75 歲之後 LTA 嘅死而不僵，你嘅 25% TFC 仍然係會受到 LTA 嘅限制，即係唔可以拎多過 LTA 餘額嘅 25% TFC。
如果從未交過 LTA 額外稅
即係話你一定仲有 LTA 餘額，咁之後無論 PCLS 抑或 UFPLS 嘅免稅部分都有 LTA 餘額四分之一為上限，而且每次拎錢個 LTA 餘額會一直扣落去直至歸零，只不過 75 歲之後超過 LTA 餘額嘅話係唔會有額外長命百稅，因為 BCE 5A 同 5B 已經一次過將你未拎嘅錢一次過收取額外稅。
如果 75 歲之前有畀 LTA 額外稅
咁你未到 75 歲已經過咗 LTA，一定唔會再有 25% 免稅部分，而且當你 75 歲嗰陣仲有錢喺退休金戶口嘅話都一定會即交 LTA 額外稅。
如果 75 歲 BCE 5B 嗰吓要收稅
雖然 BCE 5B 判斷你退休金仲淨返太多錢要交額外稅，但係由於交嗰吓你唔係拎錢出嚟，係冇拎到 TFC，喺計算額外稅嘅角度爆咗 LTA，但係喺計算 25% TFC 嘅角度你就未爆 LTA，仍然可以有部分收入免稅。
所以 75 歲之後計 LTA 餘額去判斷 TFC 係幾多嘅話，BCE 5B 「用咗」嗰啲 LTA 係唔計。例如：
- 74 歲嗰陣 LTA 已經用咗 90%
- 75 歲觸發 BCE 5A，Crystallised Fund 入面啲錢比 Crystallise 嗰陣多咗相等於 LTA 嘅 5%，仲未駛畀長命百稅住
- 75 歲同時觸發 BCE 5B，Unused Fund (Uncrystallised Fund) 入面嘅錢相等於 LTA 嘅 12%，咁相當於 LTA 7% 嘅錢要即時交 25% 額外稅
- 不過 75 歲或之後你嘅 LTA 餘額仍然為 5%﹙100% – 90% – 5%﹚，作為 TFC 嘅上限
