Matched Betting 嘅旅程過咗 13 個幾月，正如點樣開始 Matched Betting 一文所言，我根據網上用家嘅介紹，用 Outplayed 呢個網站一開始入手，由免費試用，到畀第一個月會費，再徹底入坑畀一年錢，最近壽終正寢，隨著足足 17 個 Bookies 聯手迫害限制我嘅賬戶，呢條水路已經玩撚完，所以趁此機會評論一吓呢個網站。
無比較就無傷害，用咗 Outplayed 一年之後，專登畀咗一個月會費佢嘅主要對手—— OddsMonkey ——試用，以下係 Outplayed 相對優點同缺點。不過結論在前，我係傾向推薦 Outplayed，尤其係初次試玩。
Outplayed 優點
詳細
新手一開始一定係食迎新為主，而 Outplayed 佢每個迎新都好詳細咁解釋要點做，最細微點樣將賠率格式由分數轉小數，佢都會儘量講喺邊到搵到個設定，要知道個個 Bookie 網站都唔同，大部分都唔係設計到你想搵咩就即刻搵到，呢樣無疑係慳到啲時間。
當然最重要個迎新任務要點做、有咩嘢限制、Free Bets 又點套現，佢個攻略都好清楚，免費試玩嗰兩個任務佢拍晒片、又有文字解釋，就算之後嘅迎新任務，好多時如果係一種新玩法嘅話，佢都會文字解說之餘拍埋片，相比之下 OddsMonkey 唔係冇，但驟眼睇應該就冇咁詳細。
再之後去到 Reloads Offer，佢都一樣好詳細咁解釋到要做咩，專用計數機嘅 Link 佢都會做足，唔駛自己摸索用咩工具，呢個暫時睇唔到 OddsMonkey 有。
最後，Outplayed 有每日最荀 Reloads 推介，畀老手輕易知道當日，喺云云咁多間 Bookies 之中有邊間有 Reloads 任務做，非常重要，呢樣真係 OddsMonkey 畀唔到。
方便易用
介面一定係 Outplayed 完勝。雖然可能先入為主，但個人認為 OddsMonkey 個介面真係差一截。譬如迎新優惠嗰一版，佢唔知點解文字上唔寫明係邊間 Bookie，淨係 icon 用間 Bookie 個商標去分辨，但好衰唔衰佢有一部分又 Load 唔到人哋個 Logo，變咗一堆優惠係用咗佢自己 OddsMonkey 個 Logo，你唔㩒入去都唔知係邊間，有啲鳩。
另外 Outplayed 主頁係有個位畀你入一埋你畀人 Gub 咗嘅 Bookies，等佢完全過濾晒呢堆運吉網站嘅優惠容易睇啲，而呢個位 Outplayed 係畀你輕鬆打字搜尋，而且係每打一個字母個 Prompt 就慢慢收窄範圍畀你揀嚟加入黑名單，而 OddsMonkey 同樣功能係要你喺 checkbox 逐個剔，個表有近 300 間投注網站，雖然都有文字搜尋功能，不過就冇 Outplayed 咁順手，要㩒 Enter 搜尋再拉落去逐間剔。
又例如，一啲複雜少少嘅迎新優惠，Outplayed 會用唔同 Taps 去分開每一個步驟，而唔係 OddsMonkey 咁一頁超長文要你慢慢碌，好多時步驟之間要等幾日，分 Tab 一定容易啲去搵。
Outplayed 缺點
貴
Outplayed Platinum 一個月 £30 一年 £250，相比之下 OddsMonkey 一個月 £25 一年 £180，平好多，而且 Outplayed 係分 Platinum 同 Diamond，前者係冇任何 Casino 嘅優惠攻略，不過其實 Casino 好似會嘥好多時間，多數唔係完全零風險，又容易沉迷，所以 OddsMonkey 雖然會籍包埋但我都完全冇掂過。
不過咁，經驗之談，兩邊免費試用咗，之後畀一個月會費，去到一半其實佢會畀特價你，氹你續一年，呢個時候可以狗衝，最近 OddsMonkey 為例，£180 減到 £140，雖然其實相比成個 Matched Betting 可以執到嘅錢，呢啲錢慳唔慳到都唔係最重要。
無料 IT 狗
大約兩個月前 Outplayed 將以前個名 Profit Accumulator 改咗，個網站改晒名，但係一開始佢個 IT 更新係炒撚咗，啲嘢死晒，要改返轉頭，隔咗幾日佢先 Debug 好再推出。
不過，就喺我即將一年會費完結，佢無啦啦喺一月嘅時候玩系統更新，冇改名但似乎入面啲嘢有大執，結果好似兩、三日完全登入唔到，之後開返，入面啲設定係洗撚晒！好彩我自己係用 Excel 記低每場投注，否則如果用佢個記數功能，好可能會仆咗街。但係都唔係冇影響，個 Gubbed 黑名單要自己重新入返晒，好彩當時我已經收皮得七七八八，唔係應該會超炆。
更新前 Outplayed 係唔駛每次都入電郵同密碼登入，但到目前為止，更新之後次次都要登入，其實好麻煩。討論區有人投訴一啲進階功能一路都未恢復正常，我就影響唔到，到我一年會費到期取消會籍之前，佢哋都冇話主動賠返一頭半個月會籍，甚至咁重大失誤都只係出事幾日之後出 Email 話整緊，後嚟一啲進度報告都冇！
呢次算係最大污點，都唔知係好彩定唔好彩臨收皮都遇到。
OddsMonkey 短評
要講上面都講咗，平嘢無好嘢，不過如果一年之後唔係大部分 Bookies 都收晒皮、可持續利潤唔高但仲可以繼續嘅話，可以轉戰 OddsMoneky 主要淨係用佢個 Oddsmatcher，呢度執啲嗰度執啲。
隱藏秘技：佢個免費會籍就冇乜用喇，因為應該已經用 Outplayed 執咗佢哋個迎新，但係之後畀第一個月會費可以用 code：OM50減一半，即係 £12.5。個 code 係 matchedbettingblog.com 介紹，如果 OM50 用唔到可以搵吓個 Blog 有冇 update。如上面所言，再等頭一個月會籍過咗一半睇吓佢係咪有一年會費優惠，咁 £140 一年淨係用佢個 Oddsmatcher 執吓錢應該都有得做。
