好不幸地，雖然英國對消費者嘅保障比香港好，但某啲行業仍然有部分惡習，需要我哋花啲精力應對，寬頻同手提電話合約係其中嘅例子。
一般嘅合約都係定咗一年或兩年到期，而好多公司都會畀優惠新客仔，然後合約到期之後就迫你食原價，講緊係貴三、四成。有時用開好地地，唔想轉，特別係寬頻嚟講，英國選擇唔係真係好多，好多時你住嗰度，咁啱有一間提供光纖 100M 以上寬頻、而唔係濕鳩電話線 20M 龜速上綱，已經要還神，真係好好彩先會住正一個位，有兩間或以上嘅公司提供光纖上網，基本上好難玩 A轉B、B轉A 嘅遊戲。
曾經喺英國住過一間都幾舊嘅樓，戶數唔多，上網只能龜速，仲要唔係平……
但係咁又唔代表一定要硬食原價，因為可以同 Customer Service 講價。當時我用緊 Hyperoptic 上網，幾快幾爽，兩年之後要畀原價唔開心，去佢個網頁明明見到佢畀新客仔係平三成，唔係好 Gur，嗰陣係唯一一間提供光纖，但係唔 Gur 嘅程度係我寧願真係要 Cut 撚咗佢，暫時用 4G 上網，再用佢新客仔個價先 rejoin，所以先決定試佢一試。
好在佢 CS 係有 online，適合我呢啲毒撚。個講價流程大約係﹙🤡 = 我；🤖 = 佢﹚：
🤖：完咗約之後要畀返原價，不過唔係死約，隨時畀一個月通知就可以終止服務
🤡：完咗約個價咁貴，我有冇得簽約鎖死一年但係畀平啲
🤖：冇㗎，唯一可能係轉 Plan，一係上 1G、一係落 30M，咁就可以 join 個一年約
🤡：但係我見你畀新客個 plan 係平三成，咁係咪我依家 cut，之後再 join，就可以畀嗰個價？
🤖：可以，但終止服務要一個月通知，而我唔可以保證一個月之後嗰個優惠仲喺度
🤡：好啦，咁我依家 cut 啦，我幾時都好享受同一啲懲罰客戶忠誠度嘅公司打交道
🤖：你會唔會想我依家去問吓上頭會唔會批准我提供優惠嘅合約畀你？
🤡：﹙🤡﹚視乎係咩優惠啦！
🤖：好，請你等等…
最後佢畀咗個象徵式一個月貴新客仔 £1 嘅優惠畀我，而我又真係冇第二間光纖，只好硬食嗰 £1 啦，都平過原價一截嘅。
手提電話上網月費都有類似需要，不過我嗰間 3UK 相對易話為，會提醒就嚟完約畀埋唔同選擇你，但其他公司好似冇咁順灘。而根據我理解，保險——每年續約嗰啲、例如車保、家居保、寵物——都有類似問題，畀優惠吸咗你嚟，舊客先湯你。建議每次完約，都 Google 一吓間公司名加 Haggle，睇吓網上面有冇人分享成功經歷。
