承上文，退咗休都要繼續交稅，而且資料搜集途中，發現各種退休金拎錢嘅選項及其衍生出嚟稅制，複雜程度係始料不及，經過多日鑽研仍感不足，嚴重懷疑退咗休、退埋化啲老坑係點樣有能力理解啲咁複離嘅嘢，真係有啲痴撚線。不過，除咗市面上要畀錢嘅獨立理財顧問可以幫到手，政府都有免費嘅 Pension Wise 諮詢服務，夠老就可以免費預約，我就太後生，所以只能靠自己，呢次研究大開眼界之餘仲有啲痛苦。
點解有排都未退休就要研究定？因為做緊嘢係供緊私人退休金，每個人都有權唔供，亦可以自行供多啲。喺香港，強積金只能供多不能供少，就算供多啲，個考慮點都係平衡即時扣稅，同將來對強積金制度嘅信任，退咗休拎返舊錢係唔駛交稅。但喺英國，我會認為係變咗做：即時扣稅、定係將來退休之後交返多啲稅嘅考慮，而我唔認為好多人有充分考慮後者，而且今次研究發現後者唔係咁易計。
DB 同 DC 嘅分別
喺深入了解要交幾多稅之前，要知私人退休金入面主要分兩種：Defined Benefit (DB) 同 Defined Contribution (DC)，呢兩個算係好常見嘅術語，但係我發現好似冇乜人識……
Defined Benefit Scheme
我會譯做：固定 (defined) 收入 (benefit) 嘅退休金計劃，即係退咗休每個月收到幾錢都係固定，完全取決於臨退休之前嘅人工﹙或平均人工﹚同埋喺間公司做咗幾耐嘢﹙供咗幾多年﹚，退休人士唔受投資回報影響，所以係你嘅僱主承受全部嘅投資及長命百歲風險，多數係舊制員工先有嘅福利，最常見嘅例子係政府僱員。
由於發達國家嘅人口紅利基本上用到盡，經濟唔再高速增長，亦即係投資好難搵到好高嘅回報，所以一般 DB 計劃會造成僱主嘅財政負擔﹙僱主需要保證之前儲落舊錢，個回報足夠之後出長糧﹚，長期零利率之下，要買債券去保證投資收益嘅話，會變咗保證零收益，即係退休之後要出一蚊長糧，今日就已經要拎一蚊出嚟「儲」，基本上條數係計唔掂，如果買股票嘅話又有時賺好多有時蝕到 High High、無數得計，所以絕大部分嘅公司都轉晒退休金計劃做 DC。
Defined Contribution Scheme
第二種係固定 (defined) 供款 (contribution) 嘅退休金，只有供幾錢係固定，你退休之後拎到幾多錢、幾時攞錢都係自己管理，亦即係香港強積金嗰種玩法。其實你就變咗做 DB 計劃之下老闆嗰個角色，要決定買債﹙接近零收益﹚去確保自己退休後嘅收入﹙有保證地低﹚定係買股票去希望跑贏通漲。當退休之後嗰舊錢你會有唔同嘅選擇，去決定點樣拎錢出嚟，亦即係揀自己要承受幾多風險，究竟確保自己每年都穩定拎到一個金額﹙通常會低啲﹚、定係自己繼續管理筆錢自己決定幾時、拎幾多出嚟駛。
唔知點解，DC Scheme 同時亦叫做 Money Purchase Scheme，研究過程經常見到呢兩個名詞交換用，頭都大埋。
由於 DB 已經逐漸成為歷史遺跡，我係集中研究 DC 計劃入面嘅各種花式。
另外好似有 Collective Money Purchase Scheme，共產制，一班員工夾埋一個戶口，退休就分返咁，應該唔係大路嘢。
Cash Balance Scheme
然後喺研究過程發現有第三種玩法，都幾過癮，係一早定咗你退休嗰一刻有幾多退休金，個僱主每年就供一部分，逐啲逐啲咁供落去，供幾多個實則金額係幾多唔重要，不過到退休你一定攞到咁多錢，即係話投資收益差過預期個僱主需要籌旗入錢，反之可以之後供少啲，同 DB 一樣似乎係個僱主一開頭會承受投資風險，不過退休之後你就同 DC 一樣要自己自行決定點樣管理投資同拎錢出嚟。
喺稅制上，退休之後拎錢嘅交稅安排應該同 DC 一樣。
喺 DC Plan 拎錢出嚟嘅選項
Lumpsum 一炮過
一退休就一炮過拎晒 DC Plan 入面啲錢出嚟係 Lumpsum；一次拎一部分、淨返嘅錢用其餘下面嘅選項拎錢出嚟，都係 Lumpsum。我都唔知點樣譯最好，反正呢個選項係一炮過拎一舊為數唔少嘅錢出嚟，我相信本意係唔少人一退休就環遊世界，所以呢個選項係必須嘅。
Drawdown 逐啲搣
Drawdown 就逐啲搣，類似係自己需要用錢就拎出嚟，幾時、拎幾錢都係自行決定。當然，啲錢拎晒就冇，呢個亦係 DC Plan 其中一個最大風險，需要退休人士自行管理投資組合，同埋要慳住駛。
既然 Drawdown 係完全自由，咁同不停 Lumpsum 有咩分別？呢一點我鑽研咗好撚好撚耐，包括同 ChatGPT 深度進行弱智對話，最後都叫用 Google 研究到有咩分別，主要係稅務安排唔同，拎錢個機制會有分別，不過就牽涉更多嘅述語，必須用另一篇文嘅篇幅去詳述，呢度暫時唔理住。
姑且將呢個選項歸類為長遠出金選項，同下面嘅 Life Annuity 算係同類，相反 Lumpsum 係一次過出金嘅選項，要溝埋一齊做瀨尿牛丸嘅話，可以係一開始一部分先 Lumpsum，淨返先再喺 Drawdown 同 Life Annuity 之間選擇﹙甚至係一部分 Drawdown 一部分 Annuity﹚。
Life Annuity 年金
年金就係一開始用一筆錢同保險公司﹙或退休金管理公司、好多時兩者兼備﹚買一個保障，喺你有生之年保險公司保證出糧畀你，直至你百年歸老。同 Drawdown 嘅分別就係投資回報同長命百歲嘅風險完全由保險公司承受，但係兩者嘅目標都係長遠提供退休之後嘅收入。
至於出糧可以出到幾多，就要視乎你買年金嗰吓﹙通常退休嗰日﹚：
- 當時你儲咗幾多錢﹙個本幾大﹚
- 當時你幾多歲﹙預計淨返幾多年命，你可以提早退休，亦可以延遲買年金﹚
- 當時債券利率幾高﹙利率決定債券嘅保證投資回報，至於保險公司買債定博啲買股票係佢嘅選擇﹚
另外，我相信買年金係可以加入唔同嘅選項，例如可以按通漲逐年增加嘅年金﹙當然咁會降低你一開始拎到嘅錢﹚，或者伴侶打孖年金﹙就算你瓜咗你另一半未瓜都會繼續出糧，因為譬如家庭主婦自己冇做嘢、冇儲退休金，好可能需要呢個選項去保障佢淨低落嚟嘅生活質素﹚。
Scheme Pension 年金
呢個並唔係一般 DC Plan 嘅選項，而係 DB Plan 一般嘅出金方式，不過佢同 Life Annuity 嘅操作上接近一模一樣，但就有自己嘅名，不過因為似樣所以稅務上處理非常相似，喺我嘅研究過程之中經常遇見，所以在此稍為一提。
而實際上都有少少分別，譬如網上資料提及 Scheme Pension 預設多數已經有通漲條款，有別於 Life Annuity。
退休金及其稅制嘅近代史
呢度稍為考古，記載一啲「近代史」，一嚟做研究嘅時候經常見一埋術語去拆解唔同時期退休人士嘅稅制，因此必須要稍為知道近年有過啲咩嘅改革；二嚟近十幾廿年都睇到退休金制度有唔少重大改變，隨住人口老化，究竟個社會未來需唔需要再割老一輩韮菜實在未知之數，不過可以鑑古知今，從過去嘅改革推論將來有機會畀人割嘅地方，有所警惕。
2006/07 Lifetime Allowance
上文都重點介紹過 Lifetime Allowance 喺 2006/07 呢個稅務年度推出，2023/24 年度廢除，不過實質上今年只係暫緩，下年先有望真係廢除，但係廢除又唔係完全廢除，仍然有一部分稅制係牽涉到 Lifetime Allowance，有啲痴撚線，更唔好話工黨如果下次大選贏到就似乎必定會重啟 Lifetime Allowance。
Lifetime Allowance 具體點樣打稅呢，就留返下次有人想知再講。不過考古角度出發，Lifetime Allowance 嘅引入，沿自 Finance Act 2004， 當中似乎起碼有一部分嘅原意係簡化當時嘅退休金稅制，一個稅制涵蓋所有唔同種類嘅退休金，呢個一定係好事，但 Lifetime Allowance 呢舊嘢就有啲痴撚線，不過唔知係咪以前更複雜嘅稅制有更複雜、更誇張、更痴撚線嘅物體……實在冇胃口去理解以前更痴線嘅稅制。
研究過程之中得知，Lifetime Allowance 引入嗰一日，即 2006 年 4 月 6 日叫做 A-Day，呢日之前退休嘅話有所謂 Pre A-Day 嘅計法，之後有之後 Post A-Day 嘅計法，改名條友都係痴撚線嘅……
我研究集中喺 A-Day 之後嘅退休稅制，2006 年已經夠鐘食藥退休嘅應該為數唔多。
2015/16 Pension Freedom
我都係今次研究完先知要到 2015 年啲老坑先可以自由選擇點樣喺退休金入面拎錢出嚟，再之前係只可以喺退休嗰陣買年金，佢哋叫 2015 年 4 月 6 日做 Pension Freedom Day。
不過有辣有唔辣，畀人自由轉錢或者拎錢，就自然會畀機會騙案發生，例如會有龐氏騙局呃鳩晒啲老坑畢生積蓄，不過對於會研究退休金稅制嘅人嚟講，應該就利大於弊。
2016/17 New State Pension
更早前一篇文有介紹過英國養老金須知，新制 State Pension 於 2016 年 4 月推出，目的係取代較為複雜嘅舊制，直接影響大部分人退休之後可以拎到政府幾多「生果金」。
我嘅研究應該主要係假設要捱足咁多年，無得提早退休所以會拎到全額政府養老金，而假設英國政府唔會破產走數 ^^
