廢話少講，繼續稅制嘅研究，承上文，研究集中喺 DC Plan 嘅各種出金方式及其稅務考量……
幾時可以喺退休金入面拎錢
現時新制國家養老金嘅所謂法定退休年齡係 66 歲，不過除非你已經退咗休或差唔多退休，否則到大部分人退休嗰時呢個退休年齡已經宣布咗會褪到 68 歲，所以方便起見一律假設 68 歲。同時，喺私人退休金入面拎錢，你可以選擇再早啲拎錢出嚟，技術上當係提早退休，當然你亦可以選擇遲啲先拎錢又得，唔拎又得，目前法定私人退休金拎錢出嚟嘅最低年齡係 55 歲，不過同樣呢個歲數亦宣布咗將會褪到 57 歲。
即係話，一個人儲夠退休金嘅話，可以 57 歲提早退休，之後 11 年主要靠自己供咗嘅退休金維持生活開支直至 68 歲，然後有國家養老金幫輕吓。
有冇得好似香港咁用移民為理由拎走啲錢？有，不過有樣嘢叫 QROPS，大約係「合資格認可海外退休金計劃」，唔喺呢個名單入面嘅退休金計劃，轉過去會即時扣稅，我諗大約係嘔返供款嗰陣嘅免稅優惠咁啦，所以我諗主要都係畀人去生活指數較低嘅歐盟國家﹙喺個 QROPS 入面﹚退休，但你去到都係要跟返當地退休金條例拎錢同交稅，應該就唔會點慳到稅嘅。
就嚟死好似可以拎晒啲錢出嚟，講緊係醫生證明得返唔夠一年命。死咗筆退休金變遺產，受益人有遺產稅，當然唔係呢次研究嘅範圍。
液晶體顯影退休金
你帶緊嗰副液晶體顯影眼鏡，係美國兩年前過時嘅產品；而我呢一副隱形嘅液晶體顯影眼鏡，係上個月西德最新嘅產品。
《賭神》
早前提及，退休金收入雖然要畀入息稅，但係會有 25% 免稅，而個免稅機制又可以自行選擇 Lumpsum 免稅但其餘全稅、定係每次都 25% 免稅；另外，過咗 Lifetime Allowance 又會有兩個處理方式，如果係 Lumpsum 就會一次過收 55% 稅，Drawdown 就先收 25% 再交入息稅。
令人困惑嘅地方係點為之 Lumpsum 點為之 Drawdown，因為畢竟你可以不停細數目咁 Lumpsum 而達至 Drawdown 嘅效果，反之亦然。經過反覆爬文，最終結論係：舊退休金喺未拎錢同拎錢之間仲有一個步驟或選項，叫 Crystallisation，中文除咗直譯「結晶」，我只係聯想到《賭神》入面打大佬嗰副液晶體顯影眼鏡，同西德一樣，應該有咁上下歷史……
Pension Commencement Lump Sum (PCLS)
如果想喺退休嗰陣即時有一舊可觀嘅收入，而且免稅，可以選擇即時免稅拎 25% 出嚟，將來其餘收入全額納稅，呢個選項就牽涉 Crystallisation：將你私人退休金「拎出嚟」但未袋落袋住，變成 Crystallised Pension，即時效果係可以即刻收 25% 完全免稅，術語 PCLS，亦有人叫做 Tax Free Cash (TFC) 免稅收入，而淨返嘅錢就留喺呢個 Crystallised Pension，繼續投資，將來再喺呢個 Crystallised Pension 攞錢落袋就要全數交入息稅，拎錢嘅方法不外乎：
- Drawdown：幾時拎幾多自由決定
- Life Annuity：買年金——每年或每個月固定有一筆收入
Crystallised Pension 真係有啲似液晶體顯影眼鏡睇穿底牌咁，畀稅局睇穿你啲退休金收入扣稅；或者有啲似開罐頭，未開之前擺咗喺個櫃度，開罐頭嗰吓自己偷偷地食咗 25% 冇人知，淨返嘅用保鮮紙包住放入雪櫃，隔幾日再食就會畀人發現，要分返啲出嚟畀隻貓／稅局。
另外，開罐頭係唔需要一次過開晒全屋嘅罐頭，可以按自己想拎 PCLS 嘅金額，去開一部分嘅罐頭，咁嘅話基本上係將你嘅退休金分開兩個／兩種戶口，一個 Crystallised 一個 Uncrystallised。
Unsecured Pension (USP)
喺呢度再加插一個術語「無保障退休金」，當你 Crystallise 一舊退休金之後，唔即時拎晒啲錢，又唔即時買年金，呢舊錢會叫做 USP，因為舊錢仍然受投資回報影響，可升可跌，將來你可以一路 Drawdown 幾多就睇資產組合嘅造化。
Secured Pension
相反，Crystallise 之後去到任何一個位，你決定唔再自行 Drawdown，可以買年金，投資回報完全由基金管理或保險公司承受，咁舊錢就叫做 Secured Pension，好似冇英文簡稱。
Money Purchase Annual Allowance (MPAA)
打工仔儲錢落私人退休金一般都係好似強積金咁老闆同打工仔每個月各自供少少落戶口度，而打工仔供款部分會免稅。不過，其實免稅部分係每年都有一個限額叫 MPAA，只不過大部分人都唔會超額，因為目前有成 £60k。幾時先會有機會中到呢個位？基本上冇乜可能，除非臨退休而人工又高，但呢個時候更迫切嘅考慮係 Lifetime Allowance……
但係，一旦你 Crystallise 咗而且開始咗 Drawdown，咁就應該會「撻著」﹙Trigger﹚MPAA，你之後嘅 MPAA 就會得返每年 £10k。
£10k 有冇機會中到？有機嘅！通常喺個收入啱啱過咗任何一個稅階，某啲情況下，將突出嚟嗰部分隊落退休金度就會有著數。譬如某些福利只限於 Basic Rate Taxpayer ﹙交緊 20% 嘅人﹚，所以人工去到 £51k 就可能有誘因去隊 £1k 落退休金㩒低返個稅階。又或者過咗 £100k，實則稅階由 40% 跳上去 60%，咁點睇都應該隊啲錢落退休金度。
不過，由於 MPAA 撻著嘅條件係要開始咗 Drawdown，就咁拎 PCLS 唔會撻著，所以就算打緊工提早拎一筆 PCLS 出嚟，一般都未駛擔心 MPAA 住。如果仲打緊工唔知點解同時拎 Drawdown，可能本身交嘅稅都唔止 20%，轉個頭想隊返啲錢入退休金嘅可能性應該好低。
Uncrystallised Funds Pension Lump Sum (UFPLS)
PCLS 嘅相對就係 UFPLS，顧名思義，係喺一個未開嘅罐頭﹙Uncrystallised Fund﹚直接作為一筆 Lumpsum 袋晒啲錢落袋，咁自然呢筆錢就會係當中 25% 免稅，其餘納個人入息稅。本質上兩者冇乜分別，想拎 £100 Lumpsum 可以先 Crystallise £100，拎 £25 PCLS，然後即時 Drawdown 埋嗰 £75，稅務上亦完全同 £100 嘅 UFPLS 一樣。
不過，相反係未必可行，Cystallise 咗嗰部分係可以等十年、廿年之後先拎出嚟，呢點係 Lumpsum (UFPLS) 做唔到。另外，如果退休金個金額大到牽涉 Lifetime Allowance，Lumpsum 同 Drawdown 個稅務安排就會完全唔同，所以呢兩個選項係會有分別。
點解咁撚複雜
事出必有因，尤其係考古途中得知 Lifetime Allowance 嘅推出係「簡化退休金稅制」嘅其中一個環節，所以呢啲開罐頭機制應該係整嚟畀唔同退休需要。
未真係退休但急用錢
到 57 歲就可以喺私人退休金入面拎錢，而拎錢又唔代表你唔可以繼續返工。返緊工份糧要交 Income Tax 同 National Insurance，退休金嘅收入就淨係要交 Income Tax；不過，由於已經有份糧，你額外嘅退休金收入就好有可能會要交 40% 甚至 45% 稅；相比之下，同一筆錢真係退休先拎，通常都係交緊 20%，要儲到舊錢大到退休要交 40% 應該好好好有錢，應該搵專業人士避吓稅，唔應該上網聽人鳩噏，甚至啲錢擺退休金都未必係最好嘅選擇。
呢個情況底下，譬如 57 歲就想拎 £20k 出嚟，如果係 Lumpsum 拎 UFPLS 嘅話，得 £5k 免稅，本身人工唔低搞到淨返 £15k 交稅要交 40% 稅嘅話，呢 £20k 夾埋就得返 £14k 落袋，即係得七成。
相反，可以選擇 Crystallise £56k，即時拎四分之一嘅 PCLS £14k 唔駛交稅，淨返 £42k 擺住喺度再遲啲退休先 Drawdown，咁只需要交 20% 稅，即係 £33.6k 落袋， £56k 夾埋收 £47.6k 即係八成半，相比之下慳好多稅。
點解未退休仲做緊嘢要無啦啦拎錢？好難講，不外乎屋企人或自己有醫療、教育、買樓需要啩。
早買早享受、遲買慳幾舊
咁係唔係通常都應該簡 Crystallise 拎 PCLS 然後 Drawdown 呢？又唔一定。我諗如果啲錢用唔著嘅話，一開始就拎一大舊免稅收入會蝕底。因為免稅部分係退休金一個固定百分比 25%，即係話，時間愈長退休金一直投資愈滾愈大，呢 25% 嘅免稅收入就會愈遲拎愈大舊。
因此，無事無幹嘅話，似乎每年或每個月要用幾多就拎幾多 Lump Sum﹙即係 UFPLS﹚享受當中 25% 免稅應該比較理想。
資產增值同利息稅
一般投資戶口，賺到錢都要畀稅，但係退休金入面就唔駛，係你拎錢嗰吓先當收入交稅，所以如果一退休就拎晒舊錢出嚟，除咗嗰一年嘅入息稅個稅階會好高之外，亦都會失去免稅投資嘅機會。又不過，每年每人都有 ISA Allowance，係退休金以外投資賺錢﹙不論賺息定賺價﹚唔駛交稅幾乎嘅唯一途徑。
入息稅 20% 稅階係去到 £50k，應該好多人都未必退休之後一個人駛得晒 £50k 一年﹙因為通常起碼有層樓喺手唔駛交租﹚，咁攞錢應唔應該攞到咁盡每年都爆到 £50k 呢？睇落似冇分別，奈何有 Lifetime Allowance，當你舊退休金有返咁上下大筆，退休之後都好慳住駛，可能唔覺意滾吓滾吓會爆咗 Lifetime Allowance，如果到時無廢除到 Lifetime Allowance 咁就會 GG﹙Lifetime Allowance 嘅稅制非常複離，需要另開一篇專門去講﹚。
所以如無意外，我應該會每年都拎盡 20% 稅階嘅退休金收入，用淨就隊落 ISA。另外，退休金出入都有限制，ISA 可以第二日就拎晒啲錢出嚟，所以當個政府如果冇錢要加稅，喺退休金入面加稅一定容易過喺 ISA 度加稅好多，每個人都可以一宣布加稅就㩒錢走人，所以點睇都安全一啲。
