如果之前宜家傢俬嘅經歷奠定咗我喺英國投訴嘅基本方針——唔好為啖氣，要有機 R 賠償先做，咁呢穫都算係堅定咗我遇到太唔公平嘅待遇，就一定要起碼循正式途徑投訴，特別係金融機構，因為一、金融機構比起一般公司都有錢啲，二、金融機構嘅監管相對嚴格，有多重申訴機制，起碼叫做有誘因令佢哋早一步和解，唔需要有第三方嘅介入，例如牽涉仲裁員嘅調解機制，甚至去到監管機構到。
背景
幾年前買樓，好多嘢都唔係好識，例如搵銀行做按揭。咁地產經紀嗰度，通常大間啲都會有個位，借畀一間按揭經紀公司，做埋呢一浸生意。然而，由於太方便嘅關係，佢哋唔需要好好都會有人幫襯，而且多數人唔會周圍格價或者比較服務質素，變相其實搵佢哋即係做水魚，而我亦都唔例外。
市面上好多嘅按揭經紀都係唔收買家錢，叫做免費提供服務，佢哋只係會收銀行嘅佣金。但係好似我咁做水魚嘅話，個經紀都收咗我幾百鎊，事後我做轉按先發現自己做咗水魚。
題外話，咁嗰啲免費經紀會唔會專登介紹啲差啲產品呢？暫時又好似唔覺。首先，你上網可以搵到各大銀行嘅按揭產品，按幾成要收幾多息、定息或浮息、幾多年期等等，目前為止佢哋都係畀緊最抵嗰間銀行我，甚至係會畀到啲我冇諗過嘅銀行，或者同一間銀行但係上網搵唔到、暗啞底經紀公司先會有嘅產品。講多少少背景，英國按揭玩法同香港或美國唔同，唔係由頭到尾都同一個利息，通常只係頭兩年至五年﹙或最多十年﹚係「低息期」，去到一個固定日子就會停，個利息會由最初嘅低息﹙可以係定息 Fixed Rate 或者係浮息 LIBOR 加一個數﹚變為 Standard Variable Rate ﹙可以理解為類似香港嘅 Prime Rate 最優惠利率，即係好撚高﹚，咁通常低息期完咗就會轉按，頭 N 年低息，不繼循環。
其次，大部分低息嘅按揭計劃，間銀行都會一開始收一個手續費，有時會過千鎊，我諗銀行淨係將呢個費用轉嫁做佣金都唔會蝕。最後，其實個經紀唔係就咁幫銀行拉客，佢哋仲會喺申請按揭嘅過程，做中間人處理文件、遞表、同銀行或買家溝通有咩需要，我諗銀行角度嚟講，會比直接處理買家自行做按揭會慳到啲人手，正常都公平哋畀到足夠佣金佢哋，而唔駛話迫佢哋做無良中介邊個畀得多佣就介紹邊間。
事源
言歸正傳，今次要投訴嘅當然唔係因為做咗水魚，自己柒，唔可能賴人。
有趣嘅係，始作俑者唔係按揭經紀，係地產經紀。長話短說，一般買樓由傾好價錢到完成交易，聽聞係三至四個月，而我﹙屌那星！﹚足足用咗接近九個月、267 日先搞掂，賣家唔知有冇問題、兩邊律師就一定有問題互相卸膊係咁拖，但個地產經紀都唔係咩好人，做中間人做到完全唔撚理佢都算好嘢，拖到咁長，永遠——係永遠、無誇大——唔會主動打嚟話催成點、進度如何，每次都係要我打畀佢問，佢先即刻打去催，仲要一開波同我講：「喂XXX！我冇唔記得你呀，我一路催緊，等我依家打去催催先！」吹你老味簫就有你份。試過做咗兩次極限自殘社會實驗，足足一個月唔打去搵佢，結果兩次都確定佢係一．定．唔．會．主．動．打．嚟．報．告．進．度。
間嘢叫 CBRE，好似全世界都有生意，已入永久黑名單。咁我有冇投訴佢？冇，因為買家係唔駛畀地產紀佣金嘅，所以其實我唔係佢嗰客，佢基本只係代表賣家，所以我諗投訴佢哋都無用，慳返啖氣。
咁關個按揭經紀咩事？時間一轉，去到 17 個半月之後，屌！按揭經紀同我講個低息期會喺一個月之後完結，叫我同佢哋聯絡傾轉按嘅安排。點解咁震撼？因為我個按揭係「兩年期按揭」，字面上兩年，但原來佢係由按揭批咗嗰一刻計兩年﹙另加兩、三個月緩衝﹚。一般人都唔會有問題，三至四個月可以完成交易，你個按揭係中間搞一大輪先批，批咗之後有兩、三個月做緩衝，時間應該啱啱好，有多冇少，但我就因為痴撚線搞咗九個月先完成買賣程序，而中間絕對唔關按揭申請嘅事，早早已經批咗，所以搞到兩年按揭變到得返年半……
而上面都提及到，個按揭產品係有過千鎊手續費，人哋同樣價錢係做足兩年，但係我 18 個月就收皮？搞咗九個月先買到層樓當然唔關按揭經紀事，不過，按揭部分就關。我確實係有責任睇清楚條款，但係你係專業人士，仲要額外收咗我錢，係咪應該一開始知道唔對路，一係叫銀行褪遲個按揭日期，一係再申請過，等個按揭期有足兩年呢？乜撚都唔做，仲要係就嚟完一個月之前先打嚟話就嚟完，係咪痴撚線？我連正常申請轉按都未必一個月搞掂啦吓話？
投訴經歷
佢首先係打畀我話個按揭就嚟完，嗰時真係好震愕，淨係不斷盤算蝕咗幾多錢，所以只係好有限度咁表示我嘅不滿。之後佢應該係臨收工六點再 send email 畀我講多次，留低聯絡方法叫我搵佢傾轉按。我收工之後去咗食飯同飲嘢，玩咗一晚先 check email，醉醉哋火都嚟，都冇諗啲乜，喺架車度覆佢，淨係爆粗屌鳩佢廢同呃鳩人，冇乜實質內容，撻咗兩個監管機構個名：PRA 同 FCA﹙其實唔知關唔關事﹚話會投鳩訴佢，講真封 email 依家睇返都有啲尷尬，當時都完全冇諗過真係要投訴佢，純粹發泄。
而佢係有覆我嘅，話好遺憾呀乜乜柒柒咁，另外話「呀，我幫你搵到呢兩個轉按計劃‥‥﹙下刪一百字﹚」咁我都完全冇覆佢啦當然。好彩嘅係，我同一位同事傾開，佢推薦咗一間佢用開嘅經紀，話好好用好幫到手，我即刻聯絡佢哋，同日已經即刻畀到一間銀行嘅按揭我，即時申請，過程非常之順利，神奇哋好有效率咁，一個月內喺我舊按揭收皮之前轉按，完全冇畀過一刻高息，而呢間按揭經紀我亦沿用至今！
幾個月之後，本身我都冇咗件事，點知收到信，原先間按揭公司同我講，我嘅投訴已被接納？？？！！！好唔好意思令我冇咗六個月嘅按揭低息期，依家作為賠償﹙！！！﹚將六個月嘅低息期供款，同之後 Standard Variable Rate 嘅供款嘅差價畀返我！！！如果接受嘅話就填返份表畀個銀行戶口佢過數。
開心死，亂鳩爆粗都有錢袋！
故事教訓
- 按揭搵經紀，唔好搵要畀錢嗰啲做水魚
- 按揭一開始個低息年期係參考之用，最後係睇個日子去到邊日
- 蝕底咗要投訴，金融機構應該有正常途徑畀你去咁做，如果有道理，勝算應該唔低
- 反面教材，雖然最後係無心插柳柳成蔭，但係真係唔好亂屌，有啲公司會話保障員工，客人爆粗或言語上攻擊員工有機會唔 show 你
