英國交通費係其中一樣令人頭痛嘅地方，畢竟相對香港，地方咁大，即使倫敦嚟講都大香港一倍，而且唔似香港咁有七成公共交通工具都去唔到嘅地方——效野公園，其實計返條數，我又唔覺得英國特別搶錢。
話雖如此，英國火車飛售價其實都有少少複雜，基本都分繁忙時間﹙一至五返工放工﹚同非繁忙時間，當然前者會貴一截。另外，又可以提早買定享受 Advanced Tickets 嘅折扣，不過要早幾多先有 Advanced Tickets 又係條條線都唔同，一般三個月左右啦，有時短啲又可能會有少啲折扣嘅飛賣，海鮮價咁，同埋問題係，飛歐洲短線旅行分分鐘都唔會早三個月計劃好，更何況喺英國本土 Staycation？
如果返工係要搭火車，譬如唔少人都住倫敦外圍城市，每日搭火車入倫敦返工，享受平啲嘅樓價住大宅。呢啲通常都係買月票甚至年票，網上有 Commuter Towns 嘅資料，列出各外圍城市年票嘅價錢，由二千幾至五千幾鎊一年不等。呢種情況下，通常都已經係最直接慳錢嘅方法，假期去英國其他地方玩應該都會係渣車而唔係迫火車﹙住大屋多數一定有架車﹚。
咁住大城市又可以點？平時已經住豆潤咁細嘅地方，只係比以往香港嘅住所大兩、三倍，放假想搭火車去郊區玩咁點？咁好多時 Railcards 會幫到你。
幾種較有機會用到嘅 Railcards
首先最容易慳錢嘅一定係後生仔女。只要係 30 歲或以下，都會有 16-25 Railcard 或 26-30 Railcard 啱你用。唔係免費，每年要畀 £30，但係幾本上成年搭火車都平 1/3，即係原價 £24 嘅車飛，特價只需 £16。點解會有分 16-25 同 26-30？因為一、後者係兩、三年前新出嘅 Railcard，可能見班後生愈嚟愈窮掛？二、唔知點解 26-30 嗰張有少數情況唔用得，譬如 Caledonia Sleeper﹙倫敦去蘇格蘭過夜火車，夜晚上車，第二朝早到達，有床位飛但都有窮撚經濟倉。畀多少少錢係舒服過搭飛機﹚
第二個最容易慳錢嘅情況係主要倫敦或英格蘭東南部地區嘅路線。有一張叫 Network Railcard 嘅物體，都係畀 £30 一年，享受 1/3 嘅折扣。不過只限於 Network Rail 呢個網絡入面嘅路線，而且只限 Off-Peak。不過如果住倫敦，其實都幾有用，Weekend 應該會用到，較熱門嘅目的地包括 Reading、Windsor、Oxford、Cambridge 同 Bicester Village。另外，少數比後生仔女 Railcard 優勝嘅地方係一人同行，四人優惠，有朋友一齊搭火車的話，你最多可以幫另外三個人減去三分一嘅車費。其實如果唔係英國住嘅人，嚟英國旅行，幾個人一齊諗住去幾個唔同城市，呢張 Railcard 可能都會慳到錢。
第三個慳錢方法就淨係倫敦撚先啱用，而且係要經常搭地鐵嘅人。如果返工係要日日搭地鐵﹙包括 Tube、Overground、DLR、Elizabeth Line﹚返 Office，應該買月票或者年票，其中又以年票最抵，只係月票嘅 10.5 倍價錢。Tube 年票唔係呢篇文嘅重點，重點係：年票會附送一張叫 Annual Gold Card 嘅 Railcard，基本價惠同 Network Railcard 一樣，四人同行，Network Rail 網絡以內 Off-Peak 享受 1/3 嘅折扣。
最後就只係適合非毒撚嘅 Railcards：Two-together 或 Family-and-Friends Railcard。前者一定要兩個人落名買，一齊搭火車就平 1/3，分開搭就要畀原價；後者一定要有起碼一個 5-15 歳嘅小朋友同行，但係個價惠係可以延伸至同行嘅四個成人﹙平 1/3﹚加四個小朋友﹙平 60%﹚，冇小朋友一齊的話全部畀原價。應該冇地區或網絡限制，亦唔限於 Off-Peak 車飛。
| 芳齡 | 根據地 | 日日搭 Tube | 毒撚乎 | Railcard |
| <=30 | 無所謂 | 無所謂 | 無所謂 | 16-25 或 26-30 Railcard |
| 31+ | 倫敦 | 是 | 無所謂 | Annual Gold Card |
| 31+ | 倫敦 | 否 | 否 | 2-tgt 或 Family & Friends |
| 31+ | 倫敦 | 否 | 是 | Network Railcard |
| 31+ | 非倫敦 | 不適用 | 否 | 2-tgt 或 Family & Friends |
| 31+ | 非倫敦 | 不適用 | 是 | 等到 60 歳有長者卡 |
查詢所有 Railcards 可以去該網站。
點買 Railcards
去火車票務處可以買到。
但係上網依家都可以買到電子版本嘅 Railcards。
另外，如果等得，可以留意住 hotukdeals，年中得閒都會有 £20 優惠價，可以留意。
某幾隻 Railcards 係有三年 £70 嘅版本，不過似乎對於一般人嚟講都算幾大嘅投資，而且如果可以 £20 買到一年，應該儘量等。
點用 Railcards
買飛嘅時候，無論上網﹙譬如 Trainline﹚定去車站嘅售票機，應該會有一欄係畀你 Add Railcards，你只需要揀啱就會有相應嘅折扣。
又譬如，Network Railcard 係一人同行四人有折，你只需要揀 Add Network Railcard 一張，咁四張車飛個價都會平三分一。又如果你朋友係分開買，都冇問題，佢哋都可以照揀 railcard，買飛嘅時候係唔會 Check，上咗火車查飛先會叫你出示 Raildcard，到時坐埋一齊或附近畀佢睇就得。
順帶一題，上網 Trainline 買飛會每張畀多 75p 嘅手續費，可以的話去車站買，或者直接去嗰條線嘅營運公司，例如 Great Western Railway、Avanti West Coast 嘅網站買就可以慳返。不過呢啲公司嘅網站通常設計一般，Trainline 做得好好多，可以上 Trainline check 時間班次同價錢然之後去呢啲公司嘅網站買。
Railcards 額外優惠
除咗搭火車之外，16-25 / 26-30 / Annual Gold Card 三種 Railcards 係畀埋倫敦 Tube 嘅優惠，同樣係減 1/3，只限 Off-Peak。
喂！Annual Gold Card 即係買咗 Tube 年票，點解仲要 Tube 嘅優惠？好簡單，你返工可能只限 Zone 1-2，咁年票通常只係買 zone 1-2，但係放假探朋友，去 Zone 3，咁就要額外畀 Zone 2 – 3 嘅價錢，買年票拎 Annual Gold Card 嘅好處係呢一程額外車費會再平 1/3，而月票係享受唔到。
咁要做啲咩先可以享受到呢個優惠？
- 要 Oyster Card
- 要上網去 TfL 開戶口登記你呢張 Oyster Card
- 去任何一個 Tube 嘅車站，出示你買咗嘅 Railcard 同呢張登記咗嘅 Oyster Card，叫佢張張 Railcard 加落張 Oyster 度，咁你用呢張 Oyster 搭車就應該係自動平 1/3
第三個動作通常都會漏，尤其係買 Tube 年票，明明張 Oyster 已經係落咗張年票入去，但係張 Annual Gold Card 係要你問佢先會加落去，唔記得就 GG，通常搭咗幾次車發覺冇減價先走去加返，而個職員係無義務提你……
詳情要知邊一張 Railcard 有啲咩 Tube 嘅優惠，可以去 TfL 相關網站。
