確實，自 2000 年成立以嚟，強積金都係由第一日開始畀人屌到依家，咁係咪真係咁差呢？我覺得係有必要實事求是，而唔係憑感覺去判斷，對於仲係香港有一筆 MPF 未拎得返嘅人，需要先認清真相，唔好覺得筆錢已經冇咗就放任唔理。對於已經去咗外國清咗倉嘅朋友，則可以用 MPF 呢個案例去審視一吓退休計劃，現階段有冇好好管理喺外國儲緊嘅退休金。
自計劃成立至今強積金回報係正數！
依家係 2022 年，十月啱啱完咗，恆指曾經單日千跌，科指亦由歷史高位跌淨四分之一，近三年應該大部分人都係眼光光咁睇住個戶口一直無底咁跌落去。
積金局每季都發佈最新統計數據，最新第三季未咁快出，不過可以睇住截至六月為止嘅數字，留意其中《表 III.5.1》，列出 2000 年以來每個財政年度﹙4 月 1 號至翌年 3 月 31 號﹚嘅供款、投資收益及結餘。最後一行加晒咁多年，得出呢二十幾年：
| 總供款 | 8,087 億 |
| 總收益 | 2,493 億 |
| 結餘 | 10,580 億 |
| 平均每年回報率 | 2.8% |
| 咁多年加埋回報率 | 23.5% |
廿年加埋先得 23.5%，當然好撚廢，不過，如標題所言，並唔係年年蝕錢：平均嘅打工仔，其實強積金係有幫手賺到錢。
「但係我啲 MPF 真係蝕緊錢！」
換句話講，如果閣下嘅強積金加埋係負數，係咪即係比其他人差，需要檢討管理方針呢？又未必。
正常嚟講，投資年期愈長，回報愈高，所以如果近一、兩年先畢業，一供款就遇到呢個大熊市，好自然係蝕緊錢。事實上，我哋可以整理一吓《表 III.5.1》嘅數字，睇吓唔同年度開始供款嘅打工仔，平均總回報係咪隨住年份有所不同。
上圖顯示到目前為止，隨住供款年期增加，總回報率亦相應增加。如果 MPF 計劃實施開始﹙2000 年﹚已經開始供，總回報去到 31%，最近先開始供，都係負回報。中間咁好彩係 2008 年金融海嘯之後低位開始供，會有 32%。
呢個表可以作為參考，對比自己開始打工嘅年份，同目前為止嘅總回報率，睇吓有冇改善空間。
頭盔，重申，以上數字截止六月，實際十月份截數嘅回報率應該會差一截，非常粗略咁鳩估，應該有 10%。
如果冇強積金我自己投資一定好啲
可能啦，但係當香港有咁多老人家要執紙皮為生，究竟有幾多人，唔駛迫都會自己儲錢呢？我心存疑問。另外，當近年嘅加密貨幣炒完又爆，甚至 GME、ARKK、TQQQ 等等，又有幾多人冇中到招呢？97 金融風暴，無數家庭因為個人貪念，破產嘅破產、失業嘅失業、賣樓還債嘅賣樓還債，對於香港人，甚至全地球人善於理財呢方面我又真係不敢苟同。強積金保咗底，舊錢叫唔駛蝕，而且金額有一定程度，好過啲人出咗糧就洗晒佢。
而且目前為止﹙將來唔敢講，遲啲基金可以買埋啲咩城投債、恆大債可能會 GG﹚，買得嘅基金都係大路嘢，唔算係龐氏騙局。2008 金融海嘯其中一個仆街位，係銀行呃鳩啲老人家，將畢身積蓄買「迷你債券」，呢個就一定係龐氏騙局。同樣地，我唔認為大部分人有具備長久睇穿龐氏騙局嘅能力。
當然，最好係 MPF Keep 到，但要強制畀人買全球被動型指數 ETF，等所有人都可以享受低廉管理費。外國退休基金做得到，不過香港應該難啲，唔迫人買城投債都要還神。
總括嚟講，唔好覺得 MPF 供款當係蝕咗，起碼要將以前供開嘅合併做一個方便管理，可以嘅話揀被動基金，或者最低限度揀自己睇好嘅地區，而唔係由得佢做預設基金，任佢嚟，同埋睇清每隻基金收費高唔高，好似保證基金咁，又唔保本，管理費又係最高，回報又低過普通股票基金，就咁睇名就揀佢，自然畀人蠶食棺材本。
最後，退休金係講長遠幾十年，以上當然係撇除一切政治因素得出嘅結論，如果撈埋一齊講，講經咩？
