上文提要：上年年尾發掘咗一條財路 Matched Betting，呢個 Post 會介紹一吓係點樣執錢法。
同香港唔同，英國賭錢係合法，唔會話有非法聚賭呢啲鳩嘢，所以會有好多唔同嘅投注網站，唔似香港馬會係壟斷咗個市場，似乎激烈嘅競爭造就咗呢一條財路。
傳統智慧長賭必輸，莊家有壓倒性優勢。但係 Matched Betting 主要係利用賭博網站﹙Bookies﹚嘅優惠去執錢，呢啲優惠係 Bookies 主動畀人去吸引賭仔愈賭愈大，而且優惠係有限，靠嘅係聚沙成塔，呢個 Bookie 執啲嗰個 Bookie 執啲。
Matched Betting 同 Arbitrage Betting 唔到，後者係靠莊家出錯盤去大手大手咁去賭，理論上前者係冇咁唔受歡迎，後者嘅話莊家應該好容易察覺你搵食而 BAM 鳩人，Matched Betting 應該難啲，因為係佢畀優惠你去執。話雖如此，最終你執吓執吓畀佢發現你長期贏錢，最終都會限制你嘅戶口，唔再畀任何優惠，咁你就唔會再執到錢。
Matched 嘅意思係買晒兩邊，旨在消滅賭博入面任何不確定性，場波未開、落注一刻你嘅利潤已經鎖定！買晒兩邊唔係主客和大包圍咁買晒，而係一邊喺 Bookie 落注、同時喺另一個叫 Exchange 嘅地方做莊受人落注，兩邊買同賣嘅「事件」係一樣，例如，我同馬會落注英格蘭將會攞世界杯，同時做莊賭英格蘭唔會攞世界杯，只要計啱數，無論結果係點，都唔會影響到我賺同蝕。
- 落注買「某事件會發生」叫 Back Bet
- 受注「某事件會發生」叫 Lay Bet
- Back Bet同 Lay Bet 係一對，一定一齊發生，差在你係買方定賣方，正如會計入面嘅 Debit Credit
- Bookies 一定係做莊嗰個，你淨係可以喺 Bookies 度去Back Bet
- Exchange 唔係投注網站，而係中介平台串連Back Bet同 Lay Bet 嘅人，你可以上 exchange 落注 Back Bet，賠率通常仲會好過各大博彩網站少少，但係冇乜優惠，所以通常淨係用佢哋嚟 Lay Bet 去對沖我哋嘅 Back Bet。
正常情況，買晒兩邊一定會蝕錢，因為投注網站賠率會低一啲，而你做莊要高一啲先會有人受，否則人人瘋狂買晒兩邊，世界唔會有窮人。所以呢個賺錢嘅基本方法嘅第一步，係賺各大 Bookies 嘅迎新優惠——好多投注網站會提供「Bet £X, Get £Y in Free Bet」嘅優惠吸引新客。去食呢個優惠，你只需要：
- 喺Bookies 度正常落注 £X ﹙back bet﹚
- 喺 Exchange 度 Lay the same bet ——呢度會蝕少少錢，大約係 £X 嘅 1-3%
- 過幾日會拎到 Bookies 畀你嘅 Free bet，但Free Bet 唔係真錢，要通過落注﹙back bet﹚嚟變出真錢
- 之後 Lay the second bet，今次因為個 Back Bet 係 Free，如果計啱數，只能賺，不會蝕
跟住落嚟會用例子說明
