如果香港係投訴之都嘅話，咁英國一定係非常內斂，就算西方國家入面對比美國，英國人普遍都係 Keep Calm and Carry On，相反美國就係 Karen 嘅發源地，甚至司法制度都相對鼓勵人去告鳩其他人。所以喺英國，我一般都好少去投訴，雖然幾乎每一日都會遇到啲痴 Q 線嘅人同事，不過投訴完又唔會得到啲乜，對方大多數都係意見接受態度照舊，我亦都逐漸適應呢度嘅所謂「生活節奏」。
但當遇到一啲極其痴撚線嘅事，有時真係不吐不快，咁我又覺得唔可以純粹發泄，所以本質上我都偏向目標係要𢱑到賠償先會去投訴。而喺我英國生活嘅第三年，喺宜家傢俬買嘢同投訴嘅經歷，就奠定咗我呢一個沿用至今嘅方針。
當時新屋入伙需要嘅傢俬都喺佢度買，而由於幾乎乜都要買過，我係需要分開兩次去，埋單都要成四位數字，而兩次當然都係送貨，因為無論買幾多送貨都係一個價錢。第一次都還好，第一次送貨「只係」漏咗幾樣嘢，打去 CS 佢喺個貨倉入面搵返到﹙？？﹚嗰幾樣嘢，過幾日送返畀我，另外有一件傢俬入面嘅一 Pair 零件，唔知點解畀咗兩舊同一個方向嘅零件，我要去返門市同佢講，然後過幾日佢哋先送返一 Pair 啱嘅畀我。嗯……要送三次貨先搞得掂，都算係正常發揮嘅……
第二次就真係嚟料：首先，正常發揮，第一次送貨一定送漏幾樣嘢，又係打去，又係貨倉入面搵到執漏咗，又過幾日送多次貨。不過今次有幾樣嘢連個倉入面都搵唔到，佢哋要落多次柯打送返畀我。到送貨嗰日，我又戇鳩鳩咁等咗成日，冇人嚟過送貨，夜晚打去佢哋話「唔知點解冇落到柯打送貨」？？？Okay，正常發揮啦，唔緊要，冇落到咪落返個柯打囉？下個禮拜同樣時間再送過嚟就 Okay。
可惜，之後嗰次都係全日飛機，又打上去，呢次似乎佢哋 Check 真啲，發覺原來要經理 Approve，上兩次都係冇 Approve 所以個系統自動取消咗個柯打，Okay 唔緊要！今次你再落多一次柯打，搵經理，三次應該乜都搞得啩？
真係太天真，今次半日冇人送過嚟我已經打去 CS 問，果然又係同一結果，根本冇安排到送貨。真係頂唔順，話佢有乜可能放我咁多次飛機，已經乜理由都用晒，完全解釋唔到發生咩事，咁我就話係咪應該賠償返我損失咗咁多時間。佢堅持賠償只可以送晒啲貨先可以安排，依家我嘅選擇只係：做同樣嘅嘢第四次，落多次柯打送貨；或者取消漏咗嗰件貨。問題係，漏咗嗰件貨係排骨床嗰舊排骨，而成個床架已經送咗嚟，咁我要個床架嚟做乜撚？係咪要買個懸浮太空床褥？佢話我可以自己「拎返去退貨囉」。
所以到最後我只可以屈服喺佢嘅淫威之下，再次嘗試送貨，今次可能我喺電話入面捽咗佢大半個鐘，令到佢啲職員終於做足所有程序，我亦都得到全屋傢俬最後一塊拼圖……
當然，冇人主動搵我傾賠償，我亦都唔想打去 CS 同佢哋嘈，不過我就上網搵咗一陣佢哋 CS 個電郵﹙網頁淨係叫你打去傾﹚，總結返兩次買嘢前後要送六次貨加放三次飛機先搞得掂，兼且 CS 非常幫唔到手之餘亦完全唔體諒顧客嘅需要，咁大間公司對員工嘅培訓可以差成點先有咁嘅效果。
本來諗住告一段落兼永久杯葛宜家傢俬，點知過咗幾個禮拜有人打畀我，提出賠幾十鎊，問我接唔接受，當時好嬲，因為咁少錢真係最低工資都不如，仆佢個街！跟手佢 Offer 高一倍再問要唔要！Double 完應該有最低工資，所以我就好冇骨氣咁為五斗米而折腰……
故事教訓：
- 當有嘢出錯，通常都會一直錯落去，除非你捽佢搵出個原因加以改正
- 送貨等咗半日冇聲氣最好都係打上去問米
- 第二次買嘢出大事，可能同我係畀錢佢哋幫我落倉執貨有關，第一次我自己去個倉到執好晒所有嘢﹙好撚重﹚、畀錢、同安排送貨。第二次畀錢買服務但結果附送難受
- 可以唔駛打宜家傢俬入黑名單住
