上文介紹咗一系列唔同方法去賺利息，花多眼亂，啲錢擺邊，除咗最重要比較利率之外，主要有另外兩個重點：
- 稅！任何收入基本上都可能要交稅，利息亦唔例外。不過，大部分人都有一個利息免稅額﹙Personal Savings Allowance﹚，視乎個人稅階﹙所有收入例如人工﹚而定：
- 交緊 Basic Rate﹙目前稅率 20%﹚：£1000 免稅
- 交緊 Higher Rate﹙目前稅率 40%﹚：£500 免稅
- 交緊 Additional Rate﹙目前稅率 45%﹚：£0 免稅
- 如果係超低收入甚至無收入，低過個人免稅額﹙Personal Allowance、即係一般打工仔頭過萬零鎊免稅額﹚，咁啲利息加埋都唔超過個人免稅額就唔駛交稅
- 另外，再麻煩啲，介乎超低收入同埋 Basic Rate Taxpayer，政府仲有 starting rate for savings，最多有額外 £5000 利息免稅，實際嘅免稅額視乎收入同 personal allowance 嘅差距而定。
- 等唔等舊錢駛
- 普通理財概念係呼籲有基本儲蓄習慣嘅人，先儲 6 至 12 個月開支等值嘅應急基金，譬如你每個月要駛 £1500，包括衣食住行，咁最好個戶口隨時有 £9,000 – £18,000 嘅現金，應付突發支出，或者突然失業，都可以繼續目前嘅生活模式頂到 6 至 12 個月。如果有呢個概念，呢個應急基金應該屬於隨時要拎出嚟嘅分類，咁就一定唔會做定期之類嘅儲蓄戶口。
- 然後就係一啲唔等住舊錢駛嘅類別，呢啲可以做定期。
咁可以簡單列個表總結唔同收息方法喺呢兩方面嘅考慮：
| 收息方法 | 免稅？ | 隨時拎出嚟？ |
|---|---|---|
| Easy Access | ❌ | ✅ |
| Easy Access ISA | ✅ | ✅ |
| Premium Bond | ✅ | ✅ |
| Bonus Saver | ❌ | ✅ |
| Notice Savings | ❌ | ❌ |
| Fixed Rate | ❌ | ❌ |
| Fixed Rate ISA | ✅ | ❌ |
| Regular Saver | ❌ | ❌ |
| Gilts | 💡 | ❌ |
1. 應急錢
應急錢或任何你係希望可以隨時拎到出嚟用嘅錢，可以最多分為兩舊去收息：
1.1. 免稅部分
第一舊錢，如果符合以下條件：
- 唔係畀緊 45% 稅，即係有個人利息免稅額 > £0
- 用開嗰間銀行有 Bonus Saver Account
- 例如目前 Barclays 5.12%、Nationwide 5%、HSBC 3%
建議呢部分錢直接喺自己間銀行開嗰個 Bonus Saver，通常呢啲都有一個上限，而上限賺盡一年應該都唔會多過 £500，即係如果合乎第一個條件嘅話，個利息都係免稅。如果間銀行咁荀 Bonus Saver 無存款上限，咁就計一計一年最多擺幾多係免稅。
1.2. 其餘
1.2.1. 如果舊錢有起碼 5 位數
仲有錢淨，或者唔乎合上面兩個條件，而舊錢係有 5 位數，可以全數入落 Premium Bonds，因為免稅，而且賺息之餘有可以當免費買六合彩。Premium Bonds 有上限 £50,000 但應該足以滿足大部分人需要，多過 £50,000 嘅錢我覺得起碼當唔係應急、唔愛嚟投資都可以做定期，見第二部分。
點解要 5 位數？因為係抽獎形式，太少嘅話中獎機率太低，幾乎係零。目前平均每 £24,500 先有一次機會中獎，得幾百或幾千鎊，應該就咁賺活期利息、一年拎幾十鎊算數，詳情如下。
1.2.2. 如果舊錢唔夠 5 位數
可以搵最高利息嘅活期 Easy Access，或者懶啲喺 Monzo 開個 Easy Access Saving Pot，逐少執啲。
多數加埋 1.1 嘅 Bonus Saver 啲息都唔會超過 £500，當然最好每年計吓要唔要報稅啦。
Cash ISA 有啲都會畀 easy access 高息，要格價，咁點解呢度唔建議 ISA？因為 ISA 利息應該一定低過唔係 ISA﹙銀行會食咗你個息差，咁佢搞 ISA 應該會比一般戶口多少少行政費﹚，如果係本身舊錢都不足以賺足夠利息去畀稅，根本用唔著 ISA，毋須犧性利率去開 ISA。
2. 唔等住駛嘅錢
2.1. 少少哋 Regular Saver
首先要留意嘅係自己間銀行有冇 Regular Saver，唔係間間都有，亦唔係年年都開。有啲話就好，利息要有 5%，否則太低冇撚用。通常都係上網㩒個掣就開到，每年 set 個數自動過數，非常方便，12 個月之後連本帶利收返幾十鎊，Free Money，幾千鎊就等如人哋做過萬鎊嘅定期利息。
2.2. 免稅範圍內搵間最高息嘅一年定期
先計一計個人利息免稅額，減咗上面 1.1、1.2.2 同埋 2.1 部分之後，仲淨返幾多免稅。然後除以一年定期個利息，就係呢度 2.2 部分嘅策略。同樣地，如果懶人唔想轉銀行，而又有 Monzo 嘅話就開 Monzo 12 個月 Fixed Term Savings Pot。
譬如，交緊 40% 稅，即係有 £500 利息免稅
- Bonus Saver 入咗上限 £10,000 賺緊 3%，一年有 £300
- 第 1.2.2. 部分有 £2,000 賺緊 2%，一年有 £40
- Regular Saver 每個月入 £250 有 5% 利息，年尾會收到 £80
- 即係淨返 £500 – 300 – 40 – 80 = £80 免稅
- 如果一年定期有 4.5% 息，就做 £80 / 4.5% = £1,777 定期
除非特定情況，你好確實咁喺幾個月之後有筆錢可能要駛，咁就做返相應幾個月嘅 Notice Saver 定期，否則一律一年定期。咁長啲呢？簡單嚟講都係一年，逐年逐年續。主要原因又係稅，交稅係計收息嗰一刻，即係做兩年定期，係收到兩年利息嗰一個財政年度計稅，亦即係兩年利息變相只用到一年嘅利息免稅額，唔係好抵，除非本金好少、利息好低先會做到兩年或以上嘅定期。
2.3. Fixed Term ISA
儲咗舊 6 至 12 個月開支嘅應急基金之後，通常建議有錢就擺落 ISA 度投資，作為將來退休之用。咁 ISA 入面，通常都係買股票﹙指數基金﹚長線投資、長期投入，好少會全部揸現金蝕通漲。
不過個別人嘅風險承受能力唔到，甚至有啲係工作關係有內幕消息唔准買股票，咁揸現金可能唯一選擇，咁就一定係搵一間畀最高利息嘅定期 ISA，定幾多年就冇所謂，因為冇稅務嘅考慮，可以一定定五年，唯一都係考慮返自己有冇可能幾年後要用錢﹙結婚買樓生仔裸辭等等﹚
2.4. 仲有錢淨就 Premium Bond
淨返落嚟嘅利息要交稅，變咗稅後多數最高息嘅一年定期都唔會多過 Premium Bond 個利息好多，後者仲有隨時拎錢嘅好處，同埋有六合彩屬性。
不過都係要有 5 位數先值得做，呢度係計埋應急部分 1.2.1 舊錢。如果加埋唔夠 5 位數，就睇吓個人取向，唔怕麻煩填報稅表交稅都可以畀住息咁擺定期，否則照樣擺落 Premium Bond 唔理佢，其實無壞，最多一年都中唔到一次，起碼唔會蝕。
2.5. Premium Bond 過埋上限仲有﹙好多﹚錢淨
Premium Bond 上限 £50,000，咁都過嘅話真係要好多 Cash。通常咁多錢，應該投資，同埋尋求專業意見而唔係上網聽人 9up =)
不過都係，如果特殊情況下就係想幾球嘢收利息又想避稅，其實仲有一著：買英國國債﹙Gilts﹚。
買債有債息，通常每六個月會收到票據利率﹙coupon rate﹚，最後到期日收埋最後一期利息再加本金。國債嘅利息係收稅嘅，不過國債升值嘅部分就會免稅。每條國債嘅 coupon rate 都唔同，市面上會有幾種選擇，有啲好低﹙0.125%﹚，有啲好高﹙5-6%﹚，咁低 coupon rate 一開始個買入價會低啲，到期就會變相升值，即係一開始用 90p 買入 100p 面值嘅國債，中間每六個月收嘅 coupons要交稅，但到期收到 100p 賺到 10p ﹙升值部分﹚，呢 10p 就會免稅，所以有錢人可以專買低 coupon rates 嘅國債近乎免稅去賺英國政府出嘅利息。不過只限直接買 Gilts，唔適用於國債 ETFs。
同樣方法，適用於 ISA 股票戶口。長期投資本來係唔應該嘗試跑贏大市，不過如果你好似我咁戇鳩，希望喺目前市況比較波動嘅情況下靜觀其變，但又唔想蝕利息，又唔想買國債 ETFs 因為入面係撈埋好多唔同嘅 Gilts 未必啱晒我嘅需要，可以直接買 Gilts，自己控制幾時到期，到期會賺到幾多有數得計。雖然冇稅務嘅考慮，但都會揀最低 coupon rates 嘅債嚟買，減少買債嘅 reinvestment problem。
至於點買、乜嘢係 reinvestment problem 就有排講。而且目前為止似乎只係搵到 Hargreaves Landsdown 有得網上交易﹙唔駛經電話經紀買……﹚而個最低買賣金額又係好低﹙好似係 £100﹚
