由於我有散光，一直以嚟買眼鏡都係比一般人駛得多錢，所以長期都係一種煩惱。
題外話，個人認為﹙並且堅持﹚，原則上，原本 100 蚊嘅嘢，減到 10 蚊，係十分之一嘅價錢，或者少 90%，極度厭惡為數唔少嘅人話係少十倍。因為，原本 100 蚊，佢嘅十倍係 1000 蚊，比佢﹙原本﹚少十倍，即係 100 減 1000，係負數！同樣地，身家比李嘉誠少一億倍，即係欠債以兆計，其實可以借到咁多錢，係叻仔。
而英國眼鏡舖來來去去都係嗰幾間連鎖舖頭，啱啱嚟到頭幾年想買眼鏡﹙四眼嗰隻，唔係黑超﹚去睇過，價錢唔平亦唔係特別貴，百零鎊到啦，只係想買普通黑框，但啲款真係唔係太啱心水，全部都令面唔太鍾意，最後去咗一間貴價啲嘅連鎖舖頭，先睇得啱副 Ralph Lauren，普通黑框款但啞色，埋單二百幾鎊，但係公司有資助先冇咁傷。
同時，買眼鏡或隱形眼鏡都好煩，一定要兩年內驗過眼嘅度數先畀配，唔係就焗住畀錢驗眼，而且驗眼又可能唔係即刻而要排期，搞搞吓都幾個禮拜先有。而且，個人經驗，之前喺香港都試過幾隻唔同嘅隱形眼鏡先搵到一款啱我，唔會 ung 住對眼，嚟到英國點知間嘢話無我戴開嗰個牌子，畀我試咗另外兩隻，仲話我戴開嗰隻牌子好渣。大佬！但係我戴得舒服過你嗰啲牌子囉好唔好？最後，我勉為其難揀咗隻冇咁唔啱嘅牌子，其實都唔係好舒服。
幾年之後發現可以上網買眼鏡同隱形眼鏡……
眼鏡嘅話，係十分之一嘅價錢！我十幾鎊就買到一副，仲要係幾千款任揀，度數自己填就得，同之前驗眼結果個格式係一模一樣，Power, Diameter, Base Curve, Cylinder 同 Axis 應該都係跟住填就得。其實 Google 一搵就應該搵到好多網站，我自己係幫襯 Goggles4u，不過應該度度都差唔多價錢，可能款式就因人而異啦。我呢個網得閒就會畀啲優惠碼扮做特價兩、三折，應該都係海鮮價 Mark 高然後減返畀你咁啩，總知應該二十鎊內可以買到一副，有啲應該係畀你訂五款框試戴，戴啱先配，但係咁平，我直接買算，唔啱都可以做後備。另外，個人心得，眼鏡個柄，其中一邊內側，應該係有 3 組數字，分別代表兩邊個柄嘅長度，鏡片闊度，同中間鼻托個闊度，基本上，參考返之前戴嘅眼鏡，唔差太遠的話應該會減少好多問題。
隱形眼鏡雷同。不過價錢上好似只係平少少﹙大約一至兩成？﹚，但係牌子嚟講又係完勝，我輕鬆搵到我之前戴開嗰隻，對眼無再唔斯伏，而且勝在唔駛排期驗眼。我幫襯嘅係 Vision Direct，不過同樣地，應該上網 Search 會有多過一間，而且價錢同牌子應該差唔多啩。
